Odola ematera deitu dute, COVID-19agatik odol-emate kopuruak behera egin ostean

Nekane Murga Eusko Jaurlaritzako Osasun sailburuak odola ematera deitu ditu herritarrak, egungo erreserba mailak mantentze aldera, COVID-19aren ondorioz odol-emate kopuruan beherakada izan ostean. Koronabirusaren pandemiaren egoeraren berri emateko agerraldia egin du Murgak, odol-emailearen nazioarteko egunaren bezperan, eta gogoratu du transfusiorako erabiltzen diren osagai asko eta osasun jarduerarako ezinbestekoak diren plasmatik datozen botikak lortzeko modu bakarra dela odol ematea.

49.699 odol-emaileen 82.855 odol-emate erregistratu ziren iaz Euskadin, gehienak ohikoak eta urtean birritan edo hirutan odola ematen dituztenak; gainera, 7.143 odol-emaile berri izan ziren.

Transfusio eta Giza Ehunetarako Euskal Zentroak Euskadiko 23 ospitale publikoetara eta pribatuetara bideratutako odol-emate eta produktu horiek 30.000 lagun baino gehiagok jaso zituzten, "bizitza salbatuz nahiz euren osasuna hobetuz", Murgak azaldu duenez.

Aurreko igandera arte, 35.507 odol-emate erregistratu dira. "Euskal herritarren erantzun paregabea" eskertu du sailburuak, "pandemiak ezarritako zailtasunak gorabehera, odola ematearen konpromisoari eutsi" diotelako.