Gizartea -
Emakumeen kontrako indarkeria
Gizon bat atxilotu dute emazteari jo ostean ospitalera eraman duenean
Gasteizko Txagorritxu ospitalean izan zen atzo atxiloketa. Emakumeari ustez bikotekideak egindako zauriak sendatu zizkioten bertan.
58 urteko gizonezko bat atxilotu dute bart Gasteizen emazteari tratu txarrak ematea leporatuta. Ustez emazteari jo dio eta ondoren ospitalera eraman du eragindako zauriak artatzera.
Udaltzaingoak ohar batean azaldu duenez, atxiloketa atzoko 23:00 aldera gertatu zen Txagorritxu Ospitalean.
Ospitaletik eman zioten abisua Udaltzaingoari, ustez senarrak eragindako hainbat zauri zituen emakumezko bat artatzen ari zirela ohartaraziz.
Atxilotutako gizonezkoa ospitalean zegoen emaztearekin eta orduan eraman zuten agenteek polizia-etxera.
Emakumea ospitaleratuta dago orain antsietate krisiak jota.
