Gizartea -
Trafikoa
83 urteko gizon bat hil da Diman, 4x4 ibilgailua baso-bide batetik aterata
Suhiltzaileak bertaratu dira, biktima ibilgailutik ateratzera, barruan harrapatuta geratu baita. Berarekin zihoan adingabe bat zauritu egin da.
AGENTZIAK | ERREDAKZIOA
Lur orotako ibilgailu bat gidatzen zihoan 83 urteko gizon bat hil da igande eguerdi honetan Diman (Bizkaia), baso-bide batetik atera eta iraulita, SOS Deiakek eta Bizkaiko Suhiltzaileek jakitera eman dutenez.
Basotik zihoan 4x4 ibilgailu bat bidetik atera eta irauli da, Dimako Artaun auzoan. Suhiltzaileak bertaratu dira, eta biktima ibilgailutik atera behar izan dute, bertan harrapatuta geratu baita. Osasun langileek artatu dute, baina hil egin da.
Adinekoarekin ibilgailuan zihoan 14 urteko senide bat ere zauritu da, eta Galdakaoko Ospitalera eraman dute.