Gizartea -
Koronabirusa
Donostiako Etxadi kiroldegian koronabirus kasurik izan ez dela argitu dute
Langile batek ustez positibo eman zuela eta, zentroa itxi egin zuten. Alabaina, Osakidetzak baieztatu du ez dagoela kutsatuta eta zentroa astearte honetan irekiko dute berriro.
Agentziak | Erredakzioa
Donostiako Etxadi udal kiroldegia astearte honetan irekiko dute berriro, Osakidetzak koronabirus kasurik izan ez dela egiaztatu ostean.
Igandean, kiroldegian zerbitzua ematen duen enpresa bateko langile batek PCR proban positibo eman zuela jakinarazi zioten Donostia Kirola erakundeari. COVID-19arekin gaixorik dagoen pertsona batekin –ez du loturarik kiroldegiarekin– harreman zuzena izateagatik egin zioten testa.
Horrela, bada, koronabirusari aurre egiteko protokoloa jarri zuten martxan, eta, besteak beste, gaurtik aurrera kiroldegia ixtea erabaki zuten.
Halaber, osasun agintariak ohartarazi zituzten, baina Osakidetzak gaur baieztatu du "positibo faltsua" izan zela eta langilea ez dagoela kutsatuta.
Horrenbestez, Udalak astearte honetan irekiko ditu berriro Etxadi kiroldegiaren ateak.