Kantabrian "laster" nahitaezkoa izango da maskara erabiltzea

Kantabriak derrigorrezkoa egingo du maskara erabiltzea, nahiz eta distantzia soziala mantendu, eta horretarako arautuko duen agindua "amaitzen" ari da.

Osasun Departamentuko iturriek Europa Press albiste-agentziari jakinarazi diotenez, Kantabrian maskara nahitaez erabiltzeko agindua ez da Gobernu Kontseilutik pasatu behar.

Joan den ostegunean, Pablo Zuloaga Kantabriako Gobernuko presidenteordeak norabide horretan jo zuen, baina ez zuen erabat baieztatu.

Orduan, Zuloagak azaldu zuen Kantabriako Gobernua maskara nahitaez erabiltzeko aukera aztertzen ari zela, baina azaldu zuen erabakia ez zela irmoa, eta Osasun Publikoko Zuzendaritza Nagusiaren txostenen arabera jokatuko zutela, baina Gobernu Kontseiluko kideak "nahitaez" erabiltzearen aldekoak zirela gaineratu zuen.

Badirudi erabakia hartu dutela jada, eta arautzea besterik ez dela falta, erabaki hori "lehenbailehen" bultzatzeko asmoa baitago. Hala, Zuloagak gaur goizean eskaini duen prentsaurrekoan, maskara erabiltzea derrigorrezkoa izango dela esan du, eta "beranduenez" bihar edo asteazkenean argitaratuko dutela aurreratu du.

Horrela, Kantabriak maskara derrigorrezkoa egitea erabaki duten erkidegoen zerrendarekin bat egingo du, besteak beste, erkidego hauetan hartu baitute erabaki hori: Katalunia (ostegunetik, uztailaren 9tik), Extremadura (larunbatetik), Aragoi eta Balearrak (gaurtik). EAEn ere beharrezkoa da maskara erabiltzea, baina, oraingoz, Ordizian baino ez.

Beste erkidego batzuetan ere, maskara nahitaez erabili beharraren alde egingo dute, iragarritakoaren arabera; Asturiasen, Errioxan eta Andaluzian, esaterako.