Itxi

2020/07/17

09:32

Gizartea

KORONABIRUSA

Nafarroan musukoa derrigorrezkoa da 12 urtetik gorakoentzat

AGENTZIAK | ERREDAKZIOA

Isunak, oro har, 100 eurokoak izango dira, baina sektoreko legediaren arabera moldatu ahalko dira.

  • Emakume bat musukoa jantzita, Iruñea. Irudia: EFE.

    Emakume bat musukoa jantzita, Iruñea. Irudia: EFE.

  • Whatsapp
  • Whatsapp
  • Telegram
  • Bidali

Musukoa erabiltzea derrigorrezkoa izango da Nafarroan 12 urtetik gorakoentzat gaurtik, uztailaren 17, aurrera, bide publikoan, aire zabaleko guneetan eta hainbat pertsona egon daitezkeen erabilera publikoko espazioetan eta pertsonen arteko segurtasun-distantzia bermatu daitekeen kasuetan.

"Harik eta adierazle epidemiologikoek beste transmisio-egoera batean gaudela esan arte" izango da horrela, Santos Indurain Osasun kontseilariak prentsaurrekoan esan duenez. Horren hitzetan, isunak, oro har, 100 eurokoak izango dira, baina sektoreko legediaren arabera moldatu ahalko da kopurua.

Kasu positiboen hainbat agerraldi eta sintomarik ez duten pertsonen kasuak ugaritu izanak babes-neurriak indartzera behartu du Nafarroako Gobernua, eta, zehazki, maskararen erabilera derrigortzea da hartutako neurrietako bat.

Zehazki, bide publikoan, aire zabaleko espazioetan eta erabilera publikoko espazio itxietan edo jendearentzat irekita dauden espazioetan nahitaezko erabilera ezarriko da, eta era guztietako garraio publiko edo pribatuetan ere nahitaezkoa izango da, salbu eta bidaiariak etxebizitza berean bizi badira.

Salbuespen bakarra izango da elikagai eta edariak kontsumitzen direnean, erabilerarekin bateraezinak diren jardueretan, kirola egiten den bitartean pertsonen arteko distantzia bermatzen bada, eta igerilekuetan edo horretarako egokitutako beste leku batzuetan bainua hartzen denean, baita biztanleguneetatik kanpoko jarduerak egiten direnean eta lantokietan, gutxieneko segurtasun-tartea bermatu ahal bada.

Eremu ireki edo itxietan, eremu pribatuetan, hainbat familia-gunetatik datozen pertsonen bilerak egiten direnean maskara erabiltzea gomendatzen da, segurtasun-distantzia bermatu daitekeenean ere bai.

Ez dute erabili beharrik izango arnasketa-zailtasunen bat duten pertsonek, ezta mendekotasun- edo desgaitasun-egoeragatik maskara kentzeko autonomiarik ez dutenek edo jokabide aldaketak dituzten pertsonek ere, baldin eta maskararen erabilera bideraezina bada.

Nahitaezkoa da maskara behar bezala erabiltzea; beraz, aurpegia sudur-trenkadatik kokotseraino estali behar da.

Nafarroako ikastetxeetan, erabilera xedapen espezifikoen arabera arautuko da, unean uneko egoera epidemiologikoaren arabera.

Foru Aginduak ezarri du udalei eta Foru Komunitateko Administrazioari dagokiela, beren eskumenen esparruan, zaintza-, ikuskapen- eta kontrol-eginkizunak betetzea, eta establezimendu, espazio edo lokalek araua betetzen dutela bermatu behar dute.

Araua orokortu ostean, Osasun eta Gizarte Eskubideetako departamentuek, gizarte-erakundeekin batera, kolektibo ahulei material hori eskuratzeko modua aztertzen ari dira.

Era berean, inplikatutako administrazioek informazio-kanpaina bat egitea aurreikusi dute, arau hori ezartzearen arrazoiak eta maskara, kirurgikoa edo higienikoa, behar bezala erabiltzeko modua azaltzeko.

"Dena mugatzea zaila da", adierazi du kontseilariak; hortaz, "sen ona nagusitu behar da".

Indurainek aitortu du maskara erabiltzea "deserosotasun erantsia" dela udan, baina, egungo egoera ikusita, arriskuak gutxitzen lagun dezakeela nabarmendu du.

  • Bisitatuena

      Kargatzen ikusiena
      Kargatzen ikusiena
    ;