Bi zauritu arin, hiru kamioik Irunen izan duten istripuan

Hiru kamioik istripua izan dute eta bi lagun arin zauritu dira AP-8 autobidean, Irunen (Gipuzkoa), mugatik gertu, Eusko Jaurlaritzako Segurtasun Sailak jakitera eman duenez.

Iturri horren arabera, ezbeharra 10:20 aldera gertatu da, hiru ibilgailu astunek talka egin dutenean, Nazioarteko zubitik gertu, Ipar Euskal Herrirako noranzkoan zihoazela. Ondorioz, zirkulazioaren eskuineko erreia oztopatu dute.

Iturri horren arabera, bi zaurituak bertan artatzen ari dira, eta Eusko Jaurlaritzako Trafiko Zuzendaritzak adierazi duenez, auto-ilarak 11 kilometrokoak dira dagoeneko mugan, Baionako noranzkoan.