Ia % 4 igo ziren senar-emazteen bikoteen hausturak 2010ean

Senar-emazteen bikoteen hausturak % 3,9 igo ziren 2010ean (110.311 haustura izan ziren), aurreko urtearekin alderatuta, 'Ezkontzen Baliogabetzeak, Banaketak eta Dibortzioak' Estatistikako Institutu Nazionalaren txostenaren arabera.

Ezkontza desegiteko moduari dagokionez, 102.933 dibortzio (aurreko urtean baino % 4,7 gehiago) eta 7.248 banaketa ( % 5,6 gutxiago) izan ziren guztira. Gainera, 140 bikote baliogabetu zituzten, 2009an baino % 10,2 gehiago. Horrela, dibortzioen goranzko joera indartu da, eta hausturen % 93,3 dira dagoeneko.

Homosexualen artean 245 ezkontza desegin ziren 2010ean; 137 gizonezkoen artean izan ziren eta 108 emakumezkoen artean.

Dibortzioen % 67,4 bikotekideek adostuta izan ziren eta % 32,6, berriz, elkarren artean adostu gabeak. Banaketei dagokienez, % 70,7 bikotekideek adostuta eta % 29,3 adostu gabeak izan ziren.

Aurreko urteko datuekin alderatuz, bi kopuruek gora egin dute. Izan ere, 2009an, dibortzioen %64,4 eta banaketen %67,7 heldu ziren akordio baten ondorioz. 2010ean, dibortzioen %13,3n banaketa egon zen lehenago, eta aurreko urtean %17,1ekoa izan zen ehuneko hori.

Haustura gehienak 40 eta 49 urte bitartekoen artean izan ziren. Emakumeen kasuan, 42 urte zituzten, batez beste, ezkontza haustura egitean, eta gizonezkoen kasuan, berriz, 44,6 urte.

Seme-alaben zaintza amei eman zieten hausturen % 83,2tan. Kasuen % 5,6n aitari eman zioten zaintza. % 10,5en zaintza partekatu izan zuten gurasoek, eta % 0,6n familiako norbaiti edo erakunderen bati eman zioten umearen zaintza.