Metro Bilbaoko langileek mobilizatzen jarraituko dute

80 langile inguru bildu dira asteazken honetan Metro Bilbaokonpainiako egoitzaren aurrean lantegiak berregituratzearen aurka egin eta zuzendaritzarekiko negoziazioak aurrera egiteko zain dauden bitartean protesta egiteko.

Raul Mendez (LAB) enpresa batzordeko kideak esan duenez, enpresarekin elkarrizketak egiten ari badira ere, ez dute negoziatzeko asmorik erakutsi eta, gainera, astelehenean izandako bilera luze batean "desadostasun ugari" izan ziren. Zuzendaritza teknikoak antolamenduan egin nahi dituen aldaketei buruzko dokumentua aurkeztu zuen eta ez ziren ados jarri.

Asteazken honetan hasi eta astea bukatu arte, sindikatu guztiek alegazioak aurkeztuko dituzte dokumentuaren inguruan. LAB sindikatuak "langileek parte ez hartzea eta gardentasunik ez izatea" kritikatu du, baita "mantentze lanetako langileen eginbeharretan egindako aldaketak eta hitzarmena ez errespetatzea" ere.

Langileak mantentzeko konpromisoa badago ere, etorkizunean, erretiroen, gaixotasunen eta beste hainbat arrazoien aurrean lanpostuak azpikontraten bidez betetzeko arriskuaren beldur da LAB sindikatua.

Hurrengo kontzentrazioa datorren asteazkenean izango da Eusko Jaurlaritzak Bilbon duen egoitzaren aurrean. Hizketaldietan aurrerapenik egiten ez bada, urriaren 6rako lehenengo lanuztea deituko dute. Lanuzteak 10:00etan, 12:00etan, 18:00etan, 20:00etan, 23:00etan eta 01:00ean izango dira, seguru aski.