Gizartea -
BILBO
Munduko Medikuak elkarteak doako PCRak egingo dizkie osasun txartelik ez dutenei
Elkarteak jakinarazi du ez dela beharrezkoa proba egiteko hitzordua eskatzea, eta PCRak astelehen, asteazken eta ostiralean egingo direla jakinarazi du, goizeko 10:00etatik 13:00ra.
AGENTZIAK | ERREDAKZIOA
Munduko Medikuak erakundeak doako PCR probak egingo dizkie osasun txartelik ez duten edo “Osakidetzara heltzeko zailtasunak” dituzten pertsonei.
Boluntarioz osatutako elkarte horrek, gainera, dei egin die eztula, sukarra, arnasteko zailtasunak, usaimen galera, eztarriko mina edo beherakoa gisako sintomak dituzten pertsonei, edota sintomarik izan gabe kutsatuta dagoen pertsona batekin egon direnei. COVID-19aren PCR probak erakundeak Bailen kaleko 1 zenbakian duen egoitzan egingo dira.
Elkarteak azaldu duenez, ez da beharrezkoa proba egiteko hitzordua eskatzea, eta gogorarazi dute astelehen, asteazken eta ostiraletan arituko direla, 10:00etatik 13:00ra. “Ez izan beldurrik, etor zaitez proba egitera. Ez dizugu paperik eskatuko”, gaineratu dute erakundetik.
