Gizartea -
Trafiko istripua
Azpeitiko istripuan asteartean zauritu zen auto gidaria hil da
Asteartean, 13:00ak aldera, Landetako zuzengune inguruan izan zen istripuan 22 urteko motorzale bat ere hil zen. Gertatutakoa argitzeko, Ertzaintzak lekukoen laguntza eskatu du.
EITB.EUS
Asteartean Azpeitian (Gipuzkoa) motorra batekin talka egin zuen auto gidaria hil egin da asteazken honetan, zaurien ondorioz, Azpeitiko Udalak ETB-ri baieztatu dionez. Gidariak 20 urte zituen eta Donostiako Ospitalean artatu zuten.
Ertzaintzak asteartean Gi-2634 errepidean, Landetako zuzengunean, 22 urteko motorzale bat hil zen istripuaren lekukoen laguntza eskatu du.
Ohar baten bidez, Ertzaintzaren Gipuzkoako Trafikoko Lurralde Unitateak laguntza eskatu die 13:00ak aldera ezbeharraren izan zenean, inguruan zeuden lekukoei.
Ertzaintzak ikerketa bat abiatu du gertatutakoa argitzeko, eta ezbeharraren inguruko datuak eman ditzaketen lekukoen laguntza behar du. Informazioren bat eman dezaketenek atestatuen sailarekin jar daitezke harremanetan 943 53 91 25 telefonoan.
Istripuan Suzuki motor batek eta Chrysler 300C ibilgailu batek talka egin zuten.
