Gizartea -
COVID-19
935 positibo gehiago atzeman dituzte Hego Euskal Herrian
745 izan dira EAEn, eta gainerako 190 Nafarroan. Gainera, koronabirusa zuten hiru hildako izan dira azken 24 orduetan Foru Erkidegoan.
AGENTZIAK | ERREDAKZIOA
745 positibo gehiago atzeman dituzte azken 24 orduetan EAEn, eta horietatik erdia baino gehiago Bizkaian, Eusko Jaurlaritzako Osasun Sailak larunbat honetan zabaldutako datuen arabera.
Ostiral honetan 9.826 PCR proba egin dituzte, aurreko egunean baino 15 gutxiago, hortaz, positiboen tasa % 7,6koa da. Lurraldeka, 406 kasu izan dira Bizkaian, 223 Gipuzkoan eta 114 Araba. Gainera, EAEtik kanpo bizi diren pertsonen artean beste bi kasu atzeman dituzte.
Erietxeen egoerari dagokionez, covid-19a duten 36 lagun ospitaleratu zituzten atzo eta, egun, 47 gaixo daude ZIUn (aurreko zenbaketan baino bat gutxiago).
Bestalde, Mungiako Goieta tabernan egindako baheketan, 604 PCR proba egin dituzte Urdulizko Ospitalean, eta 31 positibo atzeman. Irungo Gaztelumendi tabernari dagokionez, 889 test egin dituzte Ficoban eta dagoeneko 7k positibo eman dute.
Udalerrietako kasuak eta R0 indizea astelehenean eguneratuko dira.
Nafarroa
Bestalde, 190 kasu positibo gehiago atzeman dituzte Nafarroan, Nafarroako Osasun Publikorako Institutuak zabaldutako datuen arabera. Ostiral honetan, 2.300 PCR proba egin zituzten, inoizko zifrarik handiena Nafarroan.
Covid-19aren ondorioz, 9 ospitaleratze gehiago izan dira azken 24 orduetan, bat ZIUn. Gainera, koronabirusa zuten hiru hildako izan dira azken 24 orduetan Foru Erkidegoan, Nafarroako Foru Gobernuak ohar baten bidez jakinarazi duenez.
Zonaldeka, kutsatuen % 55 inguru Tuteran eta inguruetan atzeman dute.
