Gizartea -
Erasoa
Gizon bat atxilotu dute Barakaldon, txirrindulari bati sastakaiaz erasotzeagatik
07:.45ean izan da erasoa, txirrindularia Lutxana auzoko bidegorritik zihoala. Hiru pertsonak hartu omen dute parte erasoan, eta zauritua Gurutzetako Ospitalera eraman behar izan dute.
AGENTZIAK | ERREDAKZIOA
Gizon bat atxilotu dute Barakaldon, ostegun honetan, hilaren 17an, txirrindulari bati sastakaiaz erasotzeagatik. Segurtasun Sailak jakitera eman duenez, Bizkaiko herriko bidegorritik zihoan txirrindulariak hiru pertsonaren eraso bortitza jaso du.
07:45ean izan da erasoa, Lutxana auzoan. Erasotzaileek, lehenik, mehatxatu egin diote txirrindulariari, zerbait lapurtu nahian, eta, ondoren, sastakada eman, eta ihes egin dute.
Bidegorri beretik kirola egiten ari ziren bi emakumek, erasoa ikusi bezain pronto, Ertzaintzari eman diote abisua. Ikerketa abiatu du orduan Ertzaintzak, gertakariaren inguruko nondik norakoak argitzeko, eta bitartean, txirrindularia Gurutzetako Ospitalera eraman dute.