Gizartea -
KORONABIRUSA
Beste 6 egoiliar hil dira COVID-19arekin erresidentzietan, 3 Bizkaian eta 3 Gipuzkoan
Pandemiaren bigarren oldea hasi zenetik 44 dira jada Bizkaiko adinekoen egoitzetan hildakoak, eta 11 Gipuzkoakoetan.
AGENTZIAK | ERREDAKZIOA
Bizkaiko egoitzen sareko hiru erabiltzaile hil dira azken 48 orduetan COVID-19arekin, eta beste hainbeste Gipuzkoan.
Hala, 44 egoiliarrek galdu dute bizia pandemiaren bigarren bolada hasi zenetik Bizkaian. Une honetan, 205 egoiliar daude koronabirusak jota, horietatik 26 ospitaleratuta, Bizkaiko Foru Aldundiak igande honetan emandako datuen arabera.
Gizarte Ekintza Saileko Ikuskapen eta Kontrol Zerbitzura bidalitako datuen arabera, Bizkaiko Lurralde Historikoan adinekoentzako 155 egoitza daude (10.748 plaza). Egoitza horietan 124 pertsona positibo daude une honetan, aurreko kontaketan baino bost gehiago, eta horietako 26 ospitaleratuta daude, duela 48 ordu baino lau gehiago.
14 zentrotan dituzte kutsatutako pertsonak: DomusVI Miraflores-Bilbao (17), San Jose Etxe Alai-Mungia (15), Elorduy-Barrika (12), Ibarrekolanda-Bilbo (11), GUFE-Elorrio (11), Albiz Santiago Llanos-Sestao (11), Marcelo Gangoiti-Muskiz (10), Misericordia-Bilao (7), Santa Maria-Getxo (7), Zuetxe-Bakio (6), Loramendi-Erandio (6), Truiuondo-Zamudio (5), Ballesol-Bilbo (4) eta IMQ Igurco Zorrozgoiti-Bilbo (2).
205 egoiliarrez gain, 101 langile daude kutsatuta eta beste 57 isolamenduan daude.
Pandemia hasi zenetik, Bizkaiko egoitzetan bizi diren 1.761 pertsona kutsatu eta sendatu dira.
Gipuzkoa
Beste hiru pertsona hil dira Gipuzkoako zaharren egoitzetan azken orduotan COVID-19arekin, eta beste batek positibo eman du. Hala 11 dira guztira hildakoak eta 71 kutsatutakoak koronabirusaren bigarren oldea hasi zenetik.
Gipuzkoako Aldundiak jakitera eman duenez, bi egoiliar hil dira Hernaniko Santa Maria Magdalena egoitzan, eta beste bat Errenteriako Sagrado Corazonen.
Gainera, azken orduotan egindako PCR probetan beste positibo bat atzeman dute Santa Maria Magdalenan, baina zentro horretako bi egoiliarrek senda-agiria jaso dute.
Orain 66 dira COVID-19arekin dauden pertsonak Gipuzkoako erresidentzietan, sei zentrotan banatuta: Donostiako Hermano Garate – San Ignacio (2), Hernaniko Santa Maria Magdalena (36), Errenteriako Sagrado Corazon (16), Donostiako Alai-Etxe (10), Donostiako Zorroaga (1) eta Bergarako Mizpirualde (1).
14 pertsona daude ospitaleratuta, eta beste 34 Eibarko Ospitaleko eremu soziosanitarioan daude.
Erresidentzietan berriro kasuak atzematen hasi zirenetik, abuztuaren 11tik, 11 pertsona hil dira eta 5ek gainditu dute gaixotasuna.
