Gizartea -
COVID-19
Datorren astean baheketa egingo dute Zumaian, egoera "kezkagarriaren" aurrean
Aitzuri pilotalekua eta kiroldegia eskainiko dizkio Zumaiako Udalak Osakidetzari. "Gorakada eteteko, guztien konpromisoa beharrezkoa izango da", ohartarazi du Udalak.
Agentziak | Ererdakzioa
COVID-19 positiboen gorakada ikusita, datorren aste hasieran baheketa masiboa egingo du Osakidetzak Zumaian (Gipuzkoa). Horretarako, Udala prestatzen ari da.
Osakidetzako arduradunak ostiral honetan Zumaiara hurbilduko dira egoera aztertzeko eta baliabideak antolatzeko, Udalarekin eta anbulatorioarekin lankidetzan, Udalak ohar batean jakitera eman duenez.
Aitzuri pilotalekua eta kiroldegia eskainiko dizkio Zumaiako Udalak Osakidetzari. Era berean, Udaltzaingoa laguntzeko prest dago.
Gainera, udal Gobernuak bozeramaileen batzordea deitu du, oposizioari egoeraren berri emateko eta hartu beharreko neurriak "elkarrekin" aztertzeko. Udaleko langile guztiekin egoerari aurre egiteko neurrien azterketa egingo dute.
Zumaiako egoera "kezkagarria" dela uste du Udalak, eta positiboen "gorakada eteteko, guztien konpromisoa beharrezkoa" izango dela ohartarazi du.
Horregatik, "erantzukizunarekin" jokatzeko eskatu die Udalak herritarrei, "bizitza soziala zirkulu oso txikietara mugatzeko, osasun neurri orokorrak errespetatzeko eta maskara beti jantzita eramateko".
