300 baliabide martxan egongo dira neguko bideragarritasun planerako

Eusko Jaurlaritzak 300 baliabide martxan jarriko ditu, besteak beste, elurra kentzeko makinak, garabiak, patruilak eta ingurumena zaintzeko eta babesteko makinak, Amparo Lopez Eusko Jaurlaritzako Trafiko Saileko zuzendariak iragarri duenez.

2011-2012 urteen arteko egitasmoa gaur goizean aurkeztu dute Euskadiko trafikoa kudeatzeko zentroan egindako lan-bileran. Trafiko zuzendaritzako tekniko adituez gain, ondorengo erakundeetako ordezkariak joan dira: Eusko Jaurlaritza, Foru Aldundiak, Autopistak, Larrialdi Zerbitzuak, Eusko Jaurlaritzako Meteorologia, Ertzaintza eta Nafarroako Udaltzaingoa.

1.000 metrotik behera elurra erortzen denean jarriko dute martxan plana. Elurra kentzeko 155 makina izango dira, iazko neguan baino 15 gehiago. Zazpi garabi pisutsu ere jarriko dituzte, tona handiko ibilgailuak errepidetik kentzeko.

Halaber, ingurumena babesteko ibilgailu kopurua handitu dute aurten, 112ra, hain zuzen ere. Ertzaintzak Trafiko Unitateko patruila batzuk zerbitzu horretara bideratuko ditu, eta polizia-etxeetako baliabideek sendotuko dute zerbitzua.