Gizartea -
ATXILOKETA
Espetxera bidali dute Irunen 125 kalamu kilo zeramatzala atxilotutako kamioi gidaria
Droga atxilotuak gidatzen zuen kamioiaren zamaren artean ezkutatuta aurkitu zuten.
A. S. | EITB Media
Gipuzkoako Komandantziako Guardia Zibileko agenteek Espainiako nazionalitatea duen pertsona bat atxilotu dute Irungo mugatik gertu, osasun publikoaren aurkako ustezko delitu bat egotzita. Kamioian ezkutatuta zeraman 125 kilo marihuana atzeman dizkiote. Atxilotua espetxeratu egin dute epailearen aginduz.
Kamioi gidaria GI-636 errepidean atxilotu zuten, Frantziarako noranzkoan, zaintza fiskalerako eta mugako dispositibo batean.
Matrikula frantziarra zuen kamioiak 125 kilo marihuana zeramatzan, eta droga Frantziara eramateko asmoa zuen. Atxilotua epailearen esku utzi dute, eta hark espetxeratzeko agindua eman du.
Gainera, Donostiako Zigor arloko Epaitegi batek beste kamioilari kroaziar bat zigortu zuen atzo. Guardia Zibilak AP8 autobidean atzeman zuen, antzeko dispositibo batean, 40 kilogramo kalamu zeramatzala, joan den maiatzean.