Gizartea -
Errefuxiatuak
CEAR-Euskadik "Erbeste izan ginen. Izan gaitezen babes" kanpaina abiatu du berriro
Gabonetan opari berezi bat egiteko gonbita egin dute oraingoan: erakundearen laguntza jasotzen duten errefuxiatuen bizimodua hobetzen laguntzen duten txartel solidarioak.
eitb media
CEAR-Euskadik (Errefuxiatuen Laguntzarako Batzordea Euskadin) "Erbeste izan ginen. Izan gaitezen babes" kanpaina abiatu du berriro. Gabonetan opari berezi bat egiteko gonbita egin dute oraingoan: txartel solidarioak (erakundearen laguntza jasotzen duten errefuxiatuen bizimodua hobetzen laguntzeko txartelak).
CEAR-Euskadik adierazi duenez, “Erbeste izan ginen. Izan gaitezen babes” kanpaina horren bidez, herri gisa dugun memoria astindu nahi dute.
Horren esanetan, 36ko Gerra Zibilean "egoera tragikoa" izan zen, "gaur egun Europan babesa bilatzen ari diren pertsonak jasaten ari diren egoeraren oso antzekoa".
Batzordearen arabera, “munduan 79,5 milioi pertsona daude beren etxetik nahitaez desplazatuta”. Gainera, 2019an, 118.264 pertsonak Espainiako Estatuan nazioarteko babesa eskatu zutela salatu du, eta horietako 4.826k egin zuten Euskadin.
Ihes egiteko arrazoiak askotarikoak dira, CEAR-Euskadik aditzera eman duenaren arabera: gerra edo gatazkak, miseria, behartutako ezkontzak, krimen antolatuaren indarkeria, emakumeen mutilazio genitala, sexu-esplotaziorako salerosketa edo LGTBIQ+ pertsonen jazarpena, besteak beste.
"Garai batean gure herriak erbesteratu egin behar izan zuen, orain indarkeriatik eta miseriatik ihes egin eta gure lurraldean bakean bizi nahi dutenen babesleku gara", gaineratu dute.