Gizartea -
Bilboko Metroa
Gaur zabalduko dute Basauriko bigarren metro geltokia
Halaber, Santurtziko geltokia ere gaur zabaltzea espero da, asteburuko uholdeen ostean. Oraindik, baina, ez dago baieztatuta hala gertatuko den.
Erredakzioa
Metro Bilbaok gaur zabalduko du Basauriko bigarren geltokia, zerbitzua zabaldu zenetik eta 16 urtera.
Geltoki berriak hiru sarbide izango ditu. Lehenak, eskailera mekanikoak izango dituena, Basozelai kalean dago, Udaletxearen egoitzaren parean. Bigarrena Bidasoa kalean kokatu dute, eta ia maldarik ez duenez korridore batzuk jarri dituzte. Hirugarrena Gipuzkoa kalean dago, eta bi igogailu izango ditu.
Basauriko geltokitik hurbil bizi diren 35.500 pertsonetatik, 13.000 geltokitik 5 minututara eta beste 22.400 10 minutura daude oinez egiten badute. Bezero berriak 8 minututan helduko dira Abandora, 12 minututan San Mamesera eta 21etan Gurutzetara.
Santurtzi
Halaber, Santurtziko geltokia ere gaur zabaltzea espero da. Hain justu, asteburutik itxita dago, euri denboraleak sortutako uholdeen ondorioz.
Orain arte, zerbitzua autobusez eskaini dute.
Lanuzte partzialak
Beste alde batetik, eta bihar 9:30etatik 12:30etara metroko langileek egingo dituzten lanuzteen aurrean, Metro Bilbaok gutxienezko zerbitzuak (% 30ekoak) beteko direla ziurtatu du.
