Istripua izan ondoren semea besarkatuta hil den gizon bat aurkitu dute

Baenako (Kordoba) suhiltzaileek auto bat aurkitu dute bigarren mailako errepide baten ondoan, bost metroko sakonera duen putzu batean. Barruan, 3 urteko ume bat zegoen, bere aitaren gorpua besarkatzen.

Dirudienez, gizonezkoa larri zauritu zen istripuaren ondorioz, baina semearen ondora pasatzeko nahikoa indar izan zuen, eta hura besarkatzen hil zen. Umeak zauri bat besterik ez du bekokian.

Suhiltzaileetako batek azaldu duenez, aita eta semea Llanos del Espinar eta Castro del Río lotzen dituen errepidean aurkitu zituzten atzo, baina istripua ostegunean gertatu omen zen.

Hildakoaren emazteak ostegunean salatu zuen semea eta senarra desagertu zirela, azkena umearen bila ikastetxera joan ostean.

Bilaketa lanek ez zuten emaitzarik izan, autoa putzura bihurgune itxi batean erori zelako eta bilatzen ari ziren pertsonek errepidetik ikusi ezin zutelako, suhiltzaileek adierazi dutenez.

Istripua izan zen lekutik gertu lan egiten duen baserritar batek aurkitu zuen autoa, ostiral goizean. Suhiltzaileak bertaratu zirenean, gizona hilda aurkitu zuten, hiru urteko semea besarkatuta zuela.