Publizitatea
Itxi

2021/01/21

15:31

Gizartea

Cabacas auzia

Iñigo Cabacasen familiak NBEko Giza Eskubideen Batzordera joko du

N.B. | EITB MEDIA

"Berme guztiak" dituen epaiketa egiteko eskubidea aldarrikatu dute. Auzitegi Gorenak helegiteen muinera jo nahi izan ez duela uste dute.

0:36
Jone Goirizelaia.
  • Whatsapp
  • Whatsapp
  • Telegram
  • Bidali

Iñigo Cabacasen familiak Nazio Batuen Giza Eskubideen Batzordean kexa bat aurkeztuko du eta "berme guztiak" dituen epaiketa bat egiteko eskubidea aldarrikatuko du, Auzitegi Gorenak Bizkaiko Auzitegiaren epaia berretsi ostean. Epai horrek bi urteko kartzela-zigorra eta lau urteko gaitasungabetzea ezartzen zion ertzain bati, 2012ko apirilaren 9an Bilboko Athleticen zalea hiltzeagatik.

Hala iragarri dute ostegun honetan Jone Goirizelaia familiaren abokatuak eta hildako gaztearen gurasoek. Gaztea Ertzaintzak jaurtitako gomazko pilota batek buruan jota hil zen, Athletic eta Schalke 04 taldeak San Mamesen jokatutako futbol partidaren ostean.

Batzorde horri "ahalik eta azkarren" helegitea jartzeaz gain, Cabacas familiak eskaera bat aurkeztuko dio Europako Goi Komisiodunaren errelatore bereziari -magistratuen eta abokatuen lana eta independentzia gainbegiratzeaz arduratzen da-, "prozedura osoaren inguruan Bilboko Fiskaltzak bultzatu zuen ikerketari" buruzko txostena egin dezan, Goirizelaiak iragarri duenez.

Era berean, abokatuak gaineratu du Gorenaren epaiak baieztatu egin duela Cabacas familiak "Europara justizia bila joan behar" duela, eta argi duela "Estatuko mugetatik kanpo atera eta nazioarteko erakundeetara jo behar" duela hori lortzeko.

Ebazpenean, Goreneko Salak errefusatu egin ditu zigortutako Ertzaintzako ofizialak -polizia operazioaren aginteari dagokionez, maila gorenekoa- aurkeztutako helegiteak, bai eta Cabacasen gurasoek akusazio partikular gisa aurkeztutako helegiteak ere, eta osorik berretsi du Bizkaiko Probintzia Auzitegiaren epaia. Epai horretan, epaitutako beste bost agente absolbitu zituzten, tiro hilgarria egin zuen ertzaina nor izan zen frogatzerik lortu ez zelako.

Jone Goirizelaiaren ustez eta epaia aztertu ostean, "Auzitegi Gorenak ez du helegiteen muinera jo nahi izan, eta epaia berresteko argudioak bilatu besterik ez du egin".

Cabacas familiaren abokatuaren ustez, oinarrizko eskubide bat urratu da, "ezin izan delako gertaeren mamira iritsi, ez direlako froga guztiak egin eta ikerketa hori Ertzaintzaren aurretiazko jarduera batek baldintzatzen zuelako".

Optika korporatibista

Goirizelaiaren ustez, Auzitegi Gorenaren epaiak "berretsi egiten du Bizkaiko Auzitegiaren epaia, ikuspegi korporatibista batetik, baina ezin du saihestu Ertzaintzak gauzak ondo egin ez zituela esatea".

Abokatuaren esanetan, "agintariek agindua eman zuten, eta argi dago tiro egin zutela, beraz, badago elementu objektibo bat eta, hala ere, Gorenak dio hori, emandako agindua berresten duena, ez dela nahikoa eta epaitutako beste agenteak absolbitzen dituela, tiro egin zuen ertzaina nor izan zen frogatzea lortu ez delako".

Bestalde, Manu Cabacas gaztearen aitak adierazi duenez, "familia jipoitua eta amorratuta sentitzen da". Puntu horretan, Auzitegi Gorenera joatean "itxaropen zantzu bat zutela" gaineratu du, zerbait alda zitekeelako esperantza, baina, sententziaren berri izatean, tristura eta ezinegona sentitu dute: "Egoera errepikatu edo txarrera joan da; gainera, guri barre egiten digulako eta kostuak ordainarazten dizkigulako. Lotsagarria da", gaineratu du.

"Nazkatuta" daudela eta ezin dutela gehiago adierazi ostean, Espainiako justizian "inoiz ez dutela sinetsiko" esan du, eta, horregatik, Espainiatik kanpo zerbaitek mesede egin diezaiekeen ikusi nahi dute. "Ez dugu ematea eskatzen, baizik eta, gutxienez, ez kentzea, eta hori egin ziguten Bizkaiko Auzitegian eta orain Gorenean, eta jada ezin dugu gehiago", azpimarratu du.

 

  • Bisitatuena

      Kargatzen ikusiena
      Kargatzen ikusiena