Gizartea -
TRAFIKOA
Irurako 45 urteko gizonezko bat hil da, Donostian izan den trafiko-istripuan
Lehen ikerketen arabera, furgoneta bat bidetik atera da eta gidaria barruan harrapatuta geratu da. Suhiltzaileek atera behar izan dute. Donostia Ospitalera eraman dute larri, eta bertan zendu da.
EITB MEDIA
Irurako 45 urteko gizonezko bat hil da, bart, GI-20 errepidean izan den trafiko-istripuan, Donostia parean.
Eusko Jaurlaritzako Segurtasun Sailak jakitera eman duenez, 00:15 inguruan izan da ezbeharra, Usurbileko noranzkoan. Nissan markako furgoneta bat bidetik atera da, eta gidaria – ibilgailuan zihoan pertsona bakarra – harrapatuta geratu da. Suhiltzaileek atera behar izan dute barrutik, eta bertaratu diren osasun langileek Donostia Ospitalera eraman dute, larri. Handik gutxira, erietxean bertan zendu da.
Istripua nola eta zergatik gertatu den argitzeko, ikerketa zabaldu du Ertzaintzak.
