Euskal herritarrok 800 milioi euro xahutu ditugu loterian 5 urtetan

Euskadin bizi garen herritarrok 800 milioi euro inguru xahutu ditugu bakarrik Gabonetako Loterian azken bost urteotan, 2006 eta 2010 urteren artean. Epe horretan loterian gastutako diruarekin Osakidetzaren aurrekontuaren (erkidego guztien artean garestiena) herena ordain liteke, 230 San Mames Barria eraiki, edo lehen mailako 10 kongresu jauregi (Euskalduna Jauregia eraikitzeak 81 miloi euro inguru balio izan zuen).

Gainera, gutako bakoitzak 90,74 euro gastatu ditugu urtero bataz beste azkeneko bost urteetan; hau da, 453 euro guztira. 2010ean, euskal herritar bakoitzak 81, 65 euro gastatu zuen; 80 euro 2009an; 69,08 euro 2008an, 2007an 78,94 euro eta 144 2006 urtean.

Epe horretan xahututako 453 euro horiekin, Italiara joan gintezke itsas-bidaian; kontinente arteko hegaldiak erosi, edo apartamentu bateko astebeteko alokairua ordaindu, besteak beste, Sevillan, Cadizen, Valentzian edo Bartzelonan, udaroan, edo Andorran astebete eskiatzera joateko.

Zelan banatzen da saria?

Diruaren % 70 saridunen artean banatzen da eta gainerako % 30a saltokien komisioetara zuzentzen da (% 3,7), administrazioaren gastuetarako (% 4,3) eta Altxor Publikorako (% 22).

Zozketaren zenbaki bakoitzarekin sariren bat jasotzeko % 15 probabilitatea dago, loteriaren web gunean agertzen denez.

Ia 200 urte etenik gabe

Cadizeko Gorteen garaian sortu zen, 1812an, Indietako Ganberako presidenteak "altxor publikoaren diru-sarrerak handitzeko, zergadunei eragin barik, modu" bat bezala. Lehenengo zozketa 1812ko abenduaren 18an egin zen.

Gabonetako Loteriak ez du etenik izan, ezta Gerra Zibilean ere. Urte horietan, 1936tik 1939ra, bando bakoitzak bere zozketa egin zuen.