Adineko pertsonei zuzendutako gomendioak, lapurretak saihesteko

Ertzaintzak aholku batzuk eman nahi dizkie adineko pertsonei azken aldian tipologia bereko lapurreta batzuen biktima izaten ari baitira. Lapurreta horietako gehienak euren etxeetako atarian edo igogailuan bakarrik harrapatzen dituztenean gertatzen dira. Aholku nagusiak bi dira: ez utzi ezezagunei etxera sartzen, horretarako aitzakia edozein dela ere, eta ez sartu ezezagunekin etxeko atarian edo igogailuan.

Edozein herritarrek jasan ditzaketen lapurreta mota guztien artean, horietako tipologia batzuen biktima adineko pertsonak izaten dira gehienetan. Delitu horiek asko arindu litezke neurri txiki batzuk hartuta. Hauek dira kasu ohikoenak:

Banketxe batera joan osteko lapurretak

Kasu askotan, delitugileetako bat bulego barruan egoten da, gestioren bat egiten dagoelakoan, bezeroren bat diru-kopuru handirik ateratzen ari den ikusteko. Gero, etxeko atariraino jarraitzen diote, eta, indarrez edo edozein aitzakiarekin arreta galarazita, diru hori kendu egiten diote.

Halakoetan, komeni da beste pertsona batekin lagunduta joatea, lapurtu nahi dieten horiek euren asmoak bertan behera uztera bultzatzeko nahikoa baita; dirua kopuru txikitan ateratzea komeni da, eta atarian ezezagunekin ez sartzea.

Lapurretak etxeko atarian edo igogailuan

Lapurrek asko erabiltzen dituzte toki horiek biktimak bakarrik daudenean horiei eraso egiteko; indarra erabiliz kentzen dizkiete baliozko objektuak eta batzuetan nahiko gogorrak izaten dira. Hori dela eta, toki horietara bertakoak ez diren pertsonekin sartzea saihestu, eta ezezagunen batek jarrera susmagarririk badu, ez izan zalantzarik eta Poliziari deitu.

Lapurretak etxean

Halaber, adinekoen etxeetan ere lapurretak maiz egiten dituztela egiaztatu dute, ezezagunei bertara sartzen uzten baitiete maiz. Azterketa bat egiten ari den enpresa bateko langileak direlakoan sartzen dira lapurrak horien etxeetan, edo galdeketa edo merkataritza eskaintza bat egiteko aitzakian, eta behin barruan daudenean, baso bete ur eskatu edo komuna non dagoen galdetzen dute bakarrik geratu eta baliozko gauzak eta dirua osteko. Egoera horien aurrean, gure etxera ezezagunei sartzen ez uztea da har dezakegun neurririk onena.