Txertaketa estrategiaz arituko dira gaur Osasun Ministerioaren eta erkidegoen bileran

Espainiako Osasun Ministerioak eta autonomia erkidegoek bilera dute gaur, askorentzat Aste Santuko oporrak hasten diren egunean. Besteak beste, txertaketa estrategia eta koronabirusaren bilakaera izango dituzte mahai gainean.

Osasun Sistema Nazionaleko Lurraldearteko Kontseiluaren gaurko bileran txertaketa estrategia izango da hizpide nagusietako bat. Atzo Espainiako Osasun Publikoko Batzordeak erabaki zuen Janssenen txertoa adineko pertsonei ere jartzea. Kolektibo horren txertaketa azkartu nahi dute eta horretarako hiru txerto erabiliko dira: Pfizer, Moderna eta Janssen etxeen txertoak.

Osasun Publikoko Batzordeak beste erabaki bat ere hartu zuen, hain zuzen ere, AstraZenecaren txertoa funtsezko jarduerak egiten dituzten 65 urtetik gorako langileei ere jartzea, irakasleak, poliziak edo langile soziosanitarioak kasu.

Osasun Ministerioak Aste Santuko egun guztietan txertoa jartzeko eskatu die autonomia erkidegoei, txertaketan ahalik eta azkarren aurrera egiteko.

Bestalde, "Normaltasun berriari" buruzko legeaz ere arituko dira. Gaurtik pandemia amaitu arte indarrean egongo diren neurrien artean dago maskararen derrigorrezko erabilera, sei urtetik gorako pertsonentzat eta eremu publikoan, aire zabaleko tokietan eta publikoarentzat irekitako lekuetan, baita 1,5 metroko segurtasun distantzia errespetatzeko aukera egonda ere.

Maria Jesus Montero Espainiako Gobernuko bozeramaileak atzo esan zuenez, Lurraldearteko Kontseiluan legea errepasatuko dute, eta punturen bat zehaztu behar den argitu.