Itzuliaren bigarren etapak trafiko etenak eragingo ditu gaur Zalla eta Sestao artean

Gaur Zalla eta Sestao artean egingo den Itzulia Basque Country 2021 lasterketaren bigarren etapak eragina izango du trafikoan. Mozketak egingo dira BI-636, N-634, N-639, BI-3651, BI-630 eta BI-745 errepideetan, txirrindulariak toki horietatik pasatu baino 20 minutu lehenago.

Kontzentrazioa, sinadura eta taldeen aurkezpena 11:42 eta 12:57 bitartean egingo dira. Irtetzeko deia 13:02an egingo dute, eta benetako irteera 13:37an. Aurreikuspenen arabera, ibilbidea batez beste orduko 42 kilometroko abiaduran eginez gero, 17:18an iritsiko da tropela helmugara; 38 km/h-ko abiaduran eginez gero, berriz, 17:42an.

Etapa horretan, segurtasun- eta laguntza-dispositibo konplexu bat egin beharko dute Ertzaintzako Trafiko Unitateek, Brigada Mugikorrak, Zaintza eta Erreskate Unitateek, bai eta lasterketa igarotzen den udalerrietako ertzain-etxe guztietako agenteek eta udaltzainek ere.

Zirkulazioan izango dituen eraginei eta ordutegiei buruzko informazio eguneratua eskuragarri egongo da web-orri, aplikazio eta Twitterreko kontu ofizialetan, bai eta Eusko Jaurlaritzaren trafikoari buruzko 011 telefono-zenbakian ere. Telefono hori eguneko 24 orduetan egongo da erabilgarri.

EAEko errepide-sarean dauden mezularitza-panel aldakorren bidez emango zaie gidariei trafiko-arazoen eta -murrizketen berri.

Lasterketa etxetik ikusteko deia

Ertzaintzak lasterketaz etxetik gozatzeko deia egin die zaleei, lehentasuna parte-hartzaileen eta ikusleen osasuna zaintzea baita. Antolatzaileek ere bat egin dute mezu horrekin, berriro errepidera ateratzeko unea iritsiko dela azpimarratuz, baina oraingoan "arduraz" jokatu behar dela gaineratu dute.