Gizartea -

KORONABIRUSA

EAEko ospitaleetako egoerak okerrera egiten jarraitzen du, 173 gaixo larri baitaude

Intzidentzia-tasa metatuak ere gora egin du, 540 kasu izan baitira, baina ostegun honetan positibo gutxiago atzeman dituzte, 978, % 9ko positibotasun tasarekin.

Pertsona bat zainketa intentsiboetako unitatean. Argazkia: EFE.
Gaixo bat eta osasun langilea zainketa intentsiboetako unitatean
6.000tik gora dira astebeteko epean EAEn atzeman diren positiboak

1:16

EITB MEDIA

Whatsapp Facebook Twitter Telegram Email

Euskadiko ospitaleetako egoerak okerrera egin du berriro covid-19aren ondorioz, otsailaren hasieran zeudenen antzeko kopuruekin. Guztira 727 gaixo daude, aurreko egunean baino 13 gehiago, eta horietatik 173 (zortzi gehiago) egoera kritikoan daude zainketa intentsiboetako unitateetan.

Era berean, azken orduetan ospitaleratutako pertsonen kopuruak gora egin du berriro ere: 114 pertsona, aurreko egunean baino 94 gehiago.

Gainera, 100.000 biztanleko 14 eguneko intzidentzia-tasa metatuak goranzko joerari eutsi dio eta 540,03ra igo da, beraz, 43 egunez jarraian igo da adierazle hori.

Euskadik 978 kutsatu berri atzeman ditu joan den ostegunean, aurreko egunean baino 35 gutxiago, baina positiboen tasa 9ra igo da, eta aurreko egunean 8,1ekoa zen.

Eusko Jaurlaritzako Osasun Sailak emandako datuen arabera, azken egunean 10.907 PCR proba eta antigenoen testa egin dituzte. Kutsatu berri gehienak Gipuzkoan zenbatu dituzte, 431, Bizkaian 425 eta Araban 117. Beste bost Euskaditik kanpo bizi diren pertsonei dagozkie.

Araba da intzidentzia-tasa metatua behera egin duen lurralde bakarra, zertxobait jaitsi baita. Orain 437 ditu, eta 443,9 kasu zituen asteazkenean.

Bizkaian 442,8tik 452,5era igo da, eta Gipuzkoan 700 pertsonako muga gainditu du, 697,7tik 711,2ra.

Hiriburuei dagokienez, intzidentzia-tasa hori Gasteizen soilik jaitsi da (456,6); Bilbon, berriz, 600 kasu izan dira (599,4) eta Donostian 566,9.

Pandemiaren bilakaera neurtzeko erabiltzen den beste parametroetako bat R0 zenbakia da, infektatu batek zenbat pertsona kutsa ditzakeen adierazten duena; asteazkenean bezala jarraitzen du eta 1,03an dago.

Datu horren azpitik daude Araba (0,99) eta Bizkaia (1,02) eta gainetik Gipuzkoa (1,05).

140 ikasgela itxi dituzte, ostegunean baino 12 gehiago, 92 ikastetxetan, bederatzi gehiago. Covidaren ondorioz itxi behar izan dituzten gelen kopurua guztizkoaren % 0,80 da.

Gainera, Azkoitiko (Gipuzkoa) Bizilore Eskola Aktiboa zentroak bertan behera utzi du bere jarduera presentziala.

Brasilgo eta Hegoafrikako aldaeren gorakada nabarmena

Osakidetzak Brasilgo aldaeraren 222 kasu eta Hegoafrikako aldaeraren 54 kasu erregistratu ditu orain arte, baina pandemiaren egungo fasean aldaera nagusia britainiarra da.

Ostiral honetan emandako zenbaketan, Brasilgo eta Hegoafrikako aldaeren kasuen kopuruak nabarmen egin du gora, hilaren 20an iragarritakoen aldean. Horrela, Brasilgo aldaeraren 107 kasu erregistratu zituzten duela hiru egun arte. Hegoafrikako aldaeraren kasuak 46tik 54ra pasatu dira.

Osasun Sailak azaldu duenez, aldaera horiek tokian-tokian transmititu dira, eta Euskadin atzemandako aldaera horien kasuen kopuruak gora egin du "etengabe"; izan ere, gaur egun, aldaera nagusia britainiarra da.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.

Hau zure interesekoa bada, baliteke beste gai hauek ere izatea
Osakidetza Bizkaia Gipuzkoa Araba Euskal Autonomia Erkidegoa Gaixotasunak Gizartea Eguneko albisteak Albisteak Zientzia Hezkuntza sistemako albisteak Osasun albisteak Medikuak Basurtuko ospitalea Gurutzetako ospitalea Erizaintza Sendagaiak Txertoak Donostia Ospitalea Txagorritxu Ospitalea Koronabirusa Galdakao-Usansolo Ospitalea Anbulatorioak