Gorenak atzera bota du Skolaeren epaiari Nafarroako Gobernuak jarritako helegitea

Auzitegi Gorenak atzera bota du Skola hezkuntza programaren epaiari Nafarroako Gobernuak jarritako helegitea. Iaz Nafarroako Justizia Auzitegi Nagusiak bertan behera utzi zuen Skolae ezartzeko Hezkuntza Departamentuak emandako agindua, tramitazio akatsak argudiatuta. Orain Gorenak helegitea atzera bota arren, Skolae programa mantendu egingo dela berretsi du Maria Chiviteren gobernuak.

Nafarroako Justizia Auzitegi Nagusiak bertan behera utzi zuen Skolae hezkuntza programa ezartzeko Hezkuntza Departamentuak emandako ebazpena, prozeduran akatsak izan zirela iritzita. Auzitegiaren arabera, "legeak ezarritako prozedura erabat baztertu" zuen Hezkuntza Departamentuak, arau bezala tramitatu behar zena ekintza administratibo gisa izapidetu zuelako.

Auzitegiak ez zuen programaren edukia aztertu, baina Iruñeko bi ikastetxetako guraso batzuek aurkeztutako helegitearen zati bat aintzat hartu zuen. Salaketa jarri zutenek programa baliogabetzea eskatu zuten beren oinarrizko eskubideak urratzen zirelakoan.

Dena dela, eta orain Gorenak helegitea atzera bota arren, Skolae programaren etorkizuna ez dago kolokan, Maria Chivite buru duen gobernuaren arabera. Horren esanetan, ondoren onartu zen gizonezkoen eta emakumezkoen berdintasunerako legeak babesten du hezkuntza programa.