257ra eta 27ra jaitsi dira kasu eta ospitaleratze berriak EAEn, eta % 4,4koa da tasa

Eusko Jaurlaritzako Osasun Sailak 257 kasu berri atzeman ditu larunbat honetan, hau da, aurreko egunean baino 113 gutxiago. Gainera, ospitaleratze berriak 27ra jaitsi dira, aurreko egunean baino 16 gutxiago, baina 125 gaixok jarraitzen dute ZIUn, bezperan bezala. Martxoaren 14tik atzeman den kopururik txikiena da.

Osasun Sailak igande honetan emandako datuen arabera, larunbat honetan 5.867 proba diagnostiko egin zituzten (aurreko egunean 8.372 izan ziren) eta egindako proben positibotasun-tasa % 4,4 izan zen.

Lurraldeka, 149 kasu positibo atzeman dira Bizkaian, 78 Gipuzkoan eta 27 Araban. Gainera, hiru positibo atzeman ziren Euskal Autonomia Erkidegotik kanpo bizi diren pertsonen artean (bezperan 12).

EAEko ospitaleetan 27 gaixo ospitaleratu dituzte larunbat honetan, aurreko egunean baino 16 gutxiago, eta 125 lagunek jarraitzen dute ZIUn, ostiraleko kopuru berak.

14 egunetan metatutako intzidentzia tasa (100.000 biztanleko) eta R0 indizearen inguruko informazioa ez dute astelehenera arte eguneratuko.

44 kasu berri atzeman dituzte Nafarroan, martxoaren 14tik izan den kopururik txikiena

Koronabirusaren pandemiak beheranzko joerarekin jarraitzen du Nafarroan, larunbat honetan 44 kasu positibo berri atzeman ostean (bezperan baino 13 gutxiago). Martxoaren 14tik diagnostikatu den covid-19 kopururik txikiena da, EAEn bezala.

Mutiloa da atzo positibo berri gehien agertu ziren herria (bost) eta ondoren, Iruñeko Mendillorri auzoa (hiru).