Gizon batek sexu erasoa egin dio emakume bati Zumaian

Joan den asteburua gizonezko batek emakume bati sexu erasoa egin zion Zumaian, bertako Udalak salatu duenez. Horren harira, erasoa gaitzesteko elkarretaratzea deitu du, mugimendu feministarekin batera, gaurko (19:00etan, Beheko plazan).

Udalak bere webgunean eskegitako ohar bidez eman du erasoaren berri, bestelako daturik eskaini ez badu ere.

Gertaera matxistaren berri izan eta berehala, erasoen aurkako protokoloa martxan jarri zuela azaldu du Zumaiak Udalak. Hala, jakinarazi duenez, "informazio eta baliabide guztiak jarriko ditu" biktimaren esku, "baita bere onera etortzeko prozesuan behar izan dezakeen laguntza guztia ere".

Horrez gain, herritarrei "emakumeen aurkako indarkeriaren kontrako gaitzespen argia" plazaratzeko deia egin die, "indarkeria ez baita soilik erasoa edo hilketa pairatzen duten emakumeen arazoa, jendarte guztiarena baizik". Halaber, zumaiarrei "inplikazioa" eskatu die; "gutako bakoitzaren jarrera aktiboa erabakigarria izan daiteke eraso bat saihesteko", nabarmendu dute.

Eusko Jaurlaritako Segurtasun Sailak ez du zehaztu nahi izan eraso horren inguruko salaketarik edo ikerketarik dagoenik.