Gizartea -
Gertakaria
82 urteko gizonezko baten gorpua aurkitu dute Agauntza ibaian, Ataunen
Udalerri gipuzkoarreko herritar bat da, eta lehenengo arrastoen arabera, ez dirudi indarkeria zantzuak dituenik.
agentziak | eitb media
Larrialdi zerbitzuek 82 urteko gizonezko baten gorpua atera dute gaur arratsaldean Agauntza ibaitik, Ataunen (Gipuzkoa). Bertatik igaro den pertsona batek ikusi du gorpua uraren gainean flotatzen, eta Ertzaintzak ikerketa abiatu du gertatutakoa argitzeko.
Eusko Jaurlaritzaren Segurtasun Sailak jakitera eman duenez, 19:50 aldera izan dute gertakariaren berri. Ataungo San Gregorio auzoan aurkitu dute gorpua, ibaian. Lekukoak Larrialdi Zerbitzuei jakinarazi die, eta Ertzaintza, suhiltzaileak eta osasun langileak bertaratu dira.
Suhiltzaileak izan dira ibaira jaitsi eta biktima uretatik atera dutenak. Hilda zegoela egiaztatu dutenean, auzitegi medikuarenera eraman dute gorpua, eta 82 urteko ataundarra zela jakin dute.
Ertzaintzak ikerketa abiatu du gertatutakoa argitzeko, baina lehenengo arrastoen arabera, ez dirudi indarkeria zantzuak dituenik.