Jaioberri bat abandonatu dute edukiontzi batzuen inguruan, Gironan

10 bat eguneko jaioberria abandonatu zuten atzo Gironako Sant Pere Pescador herriko edukiontzi batzuen ondoan, Esquadra Mossoak gertakaria ikertzen ari dira. Antza, haurtxoa osasun egoera onean zegoen.

Mossoek jakinarazi dutenez, pertsona batek larrialdietara deitu zuen arratsaldeko 18:50ean, herriko edukiontzi batzuen inguruan jaioberri bat egon zitekeela esanez, baina ez zuen haurtxoa zegoen toki zehatza argitu.

Dei horren ostean, Poliziaren agenteek bilaketa lanak hasi zituzten, eta 10 minuturen buruan, patruila batek jaioberria aurkitu zuen. Manta batzuetan bilduta zegoen, kartoizko kaxa batean sartuta.

Haurtxoak, mutiko bat, zilbor-hestea zuen oraindik, etxean lokarri batekin lotu baliote bezala, horrexegatik erditzea ez zela ospitale batean izan uste dute.

Agenteek larrialdi zerbitzuei dei egin ostean umea Figueresko ospitalera eraman zuten, eta onik zegoela frogatu zuten.

Mossoek ikerketa jarri dute martxan haurraren gurasoak nortzuk diren jakin eta zergatik utzi zuten ikusteko.