Gizartea -
Lapurtutako umeen auzia
Baliteke parlamentu-batzorde bat eratzea, ume lapurtuen kasuengatik
Radio Euskadiko saio batean, hainbat legebiltzarkidek ez dute kasuak ikertzeko parlamentu-batzorde bat eratzea baztertu.
Erredakzioa
Geroz eta salaketa gehiago daude lapurtutako umeen kasuen harira. EAEn 600 kasu baino gehiago egon daitezke.
Gipuzkoa da salaketa gehien jarri diren probintzia, 129 denera (Estatu osoan 1.300 inguru daude). Bizkaian 50 jarri dira eta 30 Araban.
Dagoeneko hiru hilobi ireki dituzte eta hiruetan hilotzik ez dagoela berretsi dute.
Gainera, 1979 eta 1988 urteen artean Granadako ehorztetxe batean gidari gisa lan egiten zuen gizon batek, hileta askotara hutsik zeuden hil-kutxak eraman zituela azaldu du Radio Euskadin.
Ez da parlamentu-batzorde bat eratzea baztertzen. Hori azaldu dute Radio Euskadiko "Parlamento en la Ondas" saioan PP, PSOE, Aralar eta EAJko legebiltzarkideek. Egin daitekeela esan dute, baina, betiere, epaileen jardueraren ostean.
Aralarretik, Dani Maeztuk esan du administraziotik laguntza ekonomikoak aztertu behar direla elkarteei babesa emateko. Zentzu horretan ere mintzatu da Ricardo Gatzagaetxebarria jeltzalea. Batzorde bat eratu daitekeela uste du, baina indarra ikerketa kriminalean jarri behar dela uste du, hau da, fiskaltzarengan.
Laura Garridok, (PP) delituak oraindik preskribitu ez izana albiste ona dela adierazi du. Bestalde, Vicente Reyes PSEko legebiltzarkideak atzo lehendakariak esandako hitzak positiboki baloratu ditu, izan ere "mediku, ospitale eta hilerrien artean ongi antolatuta" egon behar zuela adierazi zuen lehendakariak eta gertatutakoa "amaiera arte" ikertu beharko dela ohartarazi zuen. Reyesek dagoeneko biktimen bulegora informazio eta babes bila hainbat familiak jo dutela gogoratu du.
