Gizartea -
Koronabirusa
Ipar Euskal Herriko diskotekek berriz ireki ditzakete ateak, osasun neurriak zorroztuz
Hain zuzen ere, txertaketa amaitu dutela, gaixotasuna gainditu dutela edo berriki egindako PCR proban negatibo eman dutela frogatu dezaketen herritarrek izango dute lokal hauetan sartzeko baimena. Diskoteken % 75ek ez dute irailera arte irekiko.
Aitor Oviedo | EITB Media
Hilabete luzez itxita egon ondoren, Ipar Euskal Herriko diskotekek ateak irekitzeko aukera izango dute ostiral honetatik aurrera, "osasun-protokolo zorrotz bat jarraituz" betiere. Hala, herritarrek, gaueko aisialdiaz gozatzeko aukera izango dute berriro, baina osasun-ziurtagiri bat aurkeztu beharko dute.
Hala iragarri zuen duela egun batzuk Gabriel Attal Frantziako Gobernuko bozeramaileak, kazetariek intzidentzia-tasari buruz eta diskoteken irekiera atzeratzeko aukerari buruz galdetu ziotenean. Prentsaurrekoan, olatu berri bati eusteko baliabide nahikoak dituztela ziurtatu zuen.
Gauzak horrela, gaurtik aurrera (uztailak 9), covid-19aren aurkako txertaketa amaitu dutela, gaixotasuna gainditu dutela edo berriki egindako PCR proban negatibo eman dutela frogatu dezaketen herritar guztiek Iparraldeko diskoteketan sartzeko aukera izango dute.
Protokolo hori kontuan izanda, ez da derrigorrezkoa izango diskoteken barruan maskara erabiltzea, baina oraindik ere oso gomendagarria da.
Horrenbestez, osasun-protokolo zorrotz batek bermatuko du diskoteketara sartzeko aukera. Ildo horretatik, osasun ziurtagiria ondo erabiltzen dela egiaztatuko dute sarreran egingo dituzten kontroletan. Edukiera ere kontrolatuko dute (% 75 barnealdean eta % 100 kanpoaldean), eta arauak betetzen ez dituzten establezimenduak ixteko aginduko dute.
Testuinguru horretan, mota horretako lokal gehienak itxita egongo dira, Frantziako Gobernuak ezarri dituen baldintzak oso zorrotzak direlako eta ezin izango dutelako irabazirik sortu. Hala, sektoreko patronalaren arabera, diskoteken % 75ek ez dute irailera arte irekiko.