Gizartea -
Okupak
Babes ofizialeko etxebizitza bat okupatzen saiatu dira Barakaldon
Bizilagun batek Udaltzaingoari deitu zion ostiralean, 05:15 aldera, eskaileretan zaratak entzun ostean, ondoko etxebizitza bat okupatzeko saiakera izan zitekeelakoan.
Agentziak | EITB Media
Hainbat pertsona babes ofizialeko etxebizitza bat okupatzen saiatu dira Barakaldon (Bizkaia), baina auzokideen arretari esker ez dute euren asmoa lortu.
Udalak ohar batean azaldu duenez, ostiralean, 05:15 aldera, bizilagun batek Udaltzaingoari deitu zion, eskaileretan zaratak entzun ostean, ondoko etxebizitza bat okupatzeko saiakera izan zitekeelakoan.
Horrela, Udaltzaingoaren agenteak bertaratu ziren, baina susmagarriek ihes egin zuten; izan ere, antza denez, kanpoan zaintzen ari zen pertsona batek jakinarazi omen zien polizia hurbiltzen ari zela.
Bertaratutakoan, udaltzainek katu hidrauliko bat aurkitu zuten etxebizitzaren atarian, susmagarriek etxebizitzan sartzeko erabilitakoa, antza.
Testuinguru horretan, Angel Madrazo Barakaldoko Herritarren Segurtasunerako zinegotziak zoriondu egin du Udaltzaingoa azkar erantzuteagatik, eta, esan duenez, babes ofizialeko etxebizitza bat okupatzeak "etxebizitza libre bat eskuratu ezin duen beste familia batek etxebizitza bat prezio merkeagoan lortzea saihestuko luke".
Trapagarango okupek ez dute etxebizitza utzi oraindik
Bestalde, Trapagaranen, okupek 85 urteko herritarraren etxean jarraitzen dute. Ekainaren amaieran okupatu zuten Trapagarango etxebizitza hori hainbat pertsonak, Funicular kaleko 32 zenbakidun atarian, bertako bizilaguna, osasun-arazoak direla eta, alaba baten etxean zegoela baliatuta. Gizona 1956tik bizi da bertan.
