Itxi

2021/08/14

12:26

Gizartea

Ez-jaiak

Botiloiak desegin dituzte Donostian eta Bermeon, eta 37 pertsona identifikatu dituzte Bakion

AGENTZIAK | EITB MEDIA

Covid-19aren neurriak neurriak ez betetzearekin lotutako istiluak "urriak" izan dira, Ertzaintzaren arabera.

1:8
  • Whatsapp
  • Whatsapp
  • Telegram
  • Bidali

Ertzaintzaren eta udaltzaingoen dispositibo koordinatuek 37 pertsona identifikatu dituzte larunbat goizaldean Bakioko portu eta hondartza inguruan, eta bide publikoan alkohola edaten ari ziren gazte taldeak desegin dituzte Bermeon eta Donostian. Gainera, 16 zigor jarri dituzte.

Segurtasun Sailak ohar baten bidez jakinarazi duenez, gaur goizaldean covid-19aren aurkako neurriak ez betetzearekin lotutako istiluak "urriak" izan dira.

Aipagarrienen artean Bakion erregistratutakoak daude; bertan, 01:15ean, gazte-taldeak bildu dira portuan eta hondartzako pasealekuan, bide publikoan edateko.

Poliziaren presentzia ikusita, desegin egin dira, baina behin baino gehiagotan errepikatu dute elkarretaratzea; hori dela eta, 37 pertsona identifikatu dituzte eta 16 zigor jarri dituzte indarrean dagoen araudia ez betetzeagatik.

Bermeon, ordubete geroago, udaltzainek laguntza eskatu diote Ertzaintzari, hirigunean pertsona talde bat desegiteko. Horietako batzuek edalontziak eta botilak jaurti dituzte agenteen aurka.

Gipuzkoan, Donostiako Alde Zaharrean, 3:30ak aldera, gazte taldeek alkohola edaten zuten gune bat hustu dute. 

Hainbat objektu jaurti dituzte patruilen aurka, baina "arazo handirik gabe" sakabanatu dira eta pertsona bat identifikatu dute.

Bestalde, Ertzaintza Hondarribiko kanpin baten ingurura joan da 3:45ean, gazte talde bat festa bat egiten ari zelako, baina polizia bertan zela ohartu direnean, festa desegitea erabaki dute.

Bilbok Begoñako Ama Birjinaren eguna ospatuko du igandean, abuztuaren 15ean, erromesaldirik eta erromeriarik gabe, meza gutxiagorekin eta basilikaren edukiera 264 lagunentzat mugatuta.

Larunbatean, hilaren 14an, hasi beharko litzateke Bizkaia osotik Begoñara arratsalde-gau partean eta igandean, egun osoan zehar, milaka fededun eramaten dituen erromesaldi ofiziala, baina pandemiak bigarren urtez jarraian bertan behera uztea eragin du. Kanpoko zabalguneak ere ohikoa ez den itxura izango du, nahiz eta tradizio batzuk, Begoñako Ama Birjinaren estanpen banaketa kasu, berreskuratu egiten diren.

Aurten ere ezin izango da Donostiako Aste Nagusi normal bat bizi, egungo egoera epidemiologikoa dela eta. Horrela, abuztuaren 1etik, Donostiak formatu txikiko kultura-programa bat du indarrean, covid-19aren aurkako egungo segurtasun-neurriak bete ahal izateko.

Euskadin indarrean jarraitzen du uztailaren 22an onartutako dekretuak, zeinak goizaldeko 1:00etara aurreratu baitzuen ostalaritzaren itxiera eta jarduera sozial eta kultural guztien amaiera, edukierak % 35era murrizten zituen, arau orokor gisa, lokal eta instalazio guztietan, eta derrigorrezkoa egiten zuen maskara erabiltzea jende ugari zebiltzan hiriguneetan.

Gauerditik goizeko seiak arte debekatuta dago botiloiak egitea eta pertsona taldeak biltzea. Gainera, Itxita jarraitzen dute ostalaritza-zerbitzuetara egokitu gabeko gaueko aisialdirako lokalek.

Bestalde, Nafarroako Justiziak baimena eman du, beste astebetez, etxeratze-agindua 01:00 eta 06:00 orduen artean luzatzeko, asteburuetan, jaiegunetan eta herriko jaiak ospatu behar ziren egunetan (bezperak barne) covid-19agatik arrisku larrian dauden udalerrientzat.

Neurri horrek 88 herritan du eragina, besteak beste, Iruñean, Tuteran, Lizarran eta Barañainen.

Ostalaritza eta gaueko aisialdia goizaldeko ordu batean itxiko dituzte, eta bilerak gehienez 10 lagunekoak izango dira.

  • Bisitatuena

      Kargatzen ikusiena
      Kargatzen ikusiena
    ;