Gizartea -
KORONABIRUSA
Positibotasunak eta ospitaleko presioak behera egin dute Euskadin
Hain zuzen ere, aurreko balantzean baino hiru paziente gutxiago daude une honetan zainketa intentsiboetako unitateetan (ZIU), eta 19 gaixo gutxiago ohe arruntetan (244).
EITB MEDIA
Astelehenean, 505 kutsatze gehiago atzeman dituzte Euskadin, aurreko egunean baino 142 gehiago. Hala ere, gorakada horrek ez du eraginik izan positibotasunean, % 8,1era jaitsi baita; izan ere, 6.246 proba diagnostiko egin zituzten atzo, bezperan baino 2.000 gehiago. EAEko ospitaleen egoerak ere hobera egin du, gaixoen kopuruak behera egiten jarraitzen baitu, gaixo larrien kopuruak barne.
Datuak lurraldez lurralde aztertuta, Araban 60 positibo hauteman dituzte, Bizkaian 260 eta Gipuzkoan 178, Eusko Jaurlaritzako Osasun Sailak astelehen honetan jakitera eman duenez.
100.000 biztanleko azken 14 egunetako intzidentzia-tasa metatua 426 kasukoa da, igandean baino zortzi kasu gutxiago. Birsorkuntza-tasa (R0), aldiz, 0,88an kokatu da.
Datuak adin-tarteak bereizita ikusiz gero, gazteenak dira kaltetuenak; 20 eta 29 urte bitartekoen artean 1.128 kasuko intzidentzia-tasa metatua dago, 17 eta 18 urte bitartekoen atzetik, 1.381 kasu baitaude tarte horretan.
EAEko ospitaleetako egoerari dagokionez, covid-19a dela eta, 50 pertsona ospitaleratu behar izan zituzten atzo gela arruntetan (bezperan baino bederatzi gehiago), eta zainketa intentsiboetako unitateetan (ZIU) 79 gaixo daude orain (hiru gutxiago); gela arruntetan, guztira 244 pertsona daude orain.
