Gizartea -
Koronabirusa
Heriotza bat eta positiboen gorakada txikia Nafarroan azken egunean
Bezperan baino 16 kasu gehiago zenbatu dituzte Foru Erkidegoan. Tuteran zortzi positibo hauteman dituzte, eta nabarmentzekoak dira Iruñeko 18 kutsatze berriak.
EITB Media
Igande honetan, 70 koronabirus kasu berri hauteman dituzte Nafarroan, Foru Erkidegoko Osasun Departamentuaren datuen arabera. Hala, bezperan (54) baino 16 kutsatze gehiago zenbatu dituzte, baina pandemiaren bilakaerak beheranzko joerari eutsi dio, 87 kasu izan baitziren duela astebete eta 97 kasu duela bi aste.
Igandean 785 proba egin ziren eta positibitate-tasa % 8,9koa izan zen.
Datuak udalerriz udalerri aztertuz gero, nabarmentzekoak dira Iruñean atzemandako 18 kutsatze berriak, gehienak II. Zabalgunean (6 kasu) eta Arrotxapean (5 positibo) atzemandakoak. Tuteran, berriz, 8 positibo berri diagnostikatu dituzte.
Bost pertsona erietxeratu behar izan zituzten atzo, bat ZIUn. Hala, erietxean covid-19agatik dauden lagunak 85 dira, horietatik 25 ZIUtan. Igandean, gainera, pertsona bat hil zen koronabirusagatik, eta arrazoi horrengatik hildakoen kopurua 1.226koa da gaur gaurkoz.
Txertoei dagokienez, igandean 2.895 dosi jarri ziren. Guztira 918.569 dosi jarri dira eta 466.372 lagunek osorik dute jada jarraibidea.
