Berdintasuna, emakumezkoen kontrako indarkeria saihesteko

Maria Silvestre Emakundeko zuzendariak larunbat honetan azpimarratu duenez, emakumezkoen aurkako indarkeria arloan borrokatzeko berdintasun politikak izan behar ditugu abiapuntu, "arazoa antzematzeko, arreta eskaintzeko eta emakume hauei babesa eskaintzeko lege on bat garatu ahal izateko".

Emakunde Genero Indarkeriaren Biktimen Laguntzarako Zuzendaritzarekin bildu da zenbaitetan genero indarkeria legearen aurreproiektuaren hirugarren ziriborroaren azken xehetasunak zehazteko asmoz. "Oraingoak lehen zirriborroarekin zerekusi gutxi du", aitortu du Silvestrek.

Gogoratu duenez, aurreproiektua 2011an publikoki eztabaidatu zen eta hortik aurrera Genero Indarkeriaren Biktimen Laguntzarako Zuzendaritzarekin negoziazio epe bat zabaldu zuten, "erakunde honek zer esan handia duelako eta zirriborroa hobetzeko haren ekarpena funtsezkoa delako".

Silvestreren aburuz, aurreproiektuak berdintasunerako politikak errespetatu beharko ditu. "Bideraezina da berdintasun politiketatik kanpo dauden genero indarkeriari buruzko neurriak lantzea", azpimarratu du. "Eusko Jaurlaritzaren iritzian, gure gizartean ematen den berdintasun ezak eragindako adierazpen bat da emakumeen aurkako indarkeria", azaldu du.