EAEko errepideen zirkulazio arazoen berri jasoko dugu nabigatzaileetan

Otsail hasieratik, EAEko errepideetatik doazen gidariek gertatu eta berehala jaso ahal dituzte zirkulazio gertakari guztiak beren nabigatzaileetan, Eusko Jaurlaritzako Herrizaingo Saileko Trafiko Zuzendaritzak martxan jarri duen RDS-TMC zerbitzuari esker. Proiektua gauzatzeko, EITBren, Itelazpiren eta LISITTen (Zirkulaziorako Informazio Teknologien eta Adimendun Sistemen Valentziako Unibertsitateko Laborategi Integratua) lankidetza izan da.

Informazio mota hau jaso ahal izateko, RDS-TMC euskarria duen GPS nabigatzailea eduki behar da ibilgailuan. Nabigatzaileak RDS-TMC hartzaile integraturik ez badu, kanpoko bat jar dakioke. RDS-TMC estandarrek bidaiariei, bidean daudela, zirkulazioaren inguruko gertakizunak helarazteko sistema definitzen dute. Horrela, erabiltzaileek informazio gehiago izatea lortzen da, aurretik bidearen egoeraren jakitun egonda, arreta maila handiagoaz gida dezaten.

RDS-TMC zerbitzua EAEn zabaltzeko Radio Euskadiren igorgailua eta Trafiko Zuzendaritzaren zuzeneko datuak erabiliko dira, kalitatezko informazio eta hedapena uztartuz, bide segurtasuna hobetzeko asmoz. Lanen, ibilgailu pilaketen -hainbat zerbitzu maila egongo dira, larritasunaren arabera-, bideko oztopoen, matxuren eta kirol ekitaldien inguruko informazioa eskainiko da.

Nabigatzailera zuzenean

Nabigatzaileek FM banda eskaneatzeko funtzio automatikoa izan ohi dute; zerbitzuarekin bat egindakoan, gelditu eta gertakizun aktiboak jasotzen hasiko da. Erabiltzailearen ibilbidean gertakizunik topatuz gero, nabigatzaileak egoeraren berri emango dio gidariari: abisua bidali eta ikono bat irudikatuko du jazoera izan den tokian. Halaber, gertakizuna saiheste aldera gidariari bide alternatibo bat gomendatzen dion funtzioa izan ohi dute nabigatzaile moderno gehienek.

RDS-TMC sistemak oinarrizko bost elementu ditu. Lehenik eta behin, datuen jatorria, zirkulazioaren inguruko datuen biltegi bat, dago; informazioa bertatik ateratzen da, gero igorri egiteko. RDS-TMC zerbitzariak zirkulaziori buruzko datu horiek hartu, estandarrei jarraituta kodetu eta irrati estazioetako RDS kodetzaileetara bidaltzen ditu. Azken horietan, informazioa estazio igorleak zabaltzen duen FM emisioan txertatzen dute. Azkenik, zerbitzuarekin bateragarria den nabigatzailea duten ibilgailuek informazioa deskodetzen dute eta modu argian erakusten diote gidariari, jaso diren gertakizunen ikonoa marraztuz eta erabiltzaileak egoeraz ohartaraziz.

Zerbitzuaren berri igortzeko puntuak EAEko azalera gehienera heltzen dira, eta irrati estazio hauek hartzen dituzte: Joar, Txibiarte, Zaldiaran, Bermeo, Ganeta, Karrantza, Garbea, Elosua, Igeldi, Jaizkibel, Kortazar, Tolosa, Usurbe eta Zarautz. Gidariek aplikazioan kontsultatu ahal dituzten hainbat aukera erakusten dituzte atxikitako irudiek.