Goiz korapilotsua Gipuzkoako errepideetan, hainbat istripuren ondorioz

Gipuzkoa errepide sarea bere onera etortzen ari da pixkanaka, goiz korapilotsuaren ostean. Alde batetik, 09:30ak aldera auto batek istripua izan du AP-8an, Usurbil parean, eta, ondorioz, errepidea itxi egin dute. Auto-ilarak sortu dira bi noranzkoetan, baina 11:00ak aldera berriz ireki dute errepidea.

Ez da gaur goizean Gipuzkoako errepideetan izandako istripu bakarra izan. 08:00ak aldera, kamioi batek artaziarena egin du N-1 errepidean, Tolosa parean, eta auto-ilarak sortu dira goiz osoan bi norabideetan.

Gainera, zazpi pertsona zauritu dira gaur goizaldean Hondarribian, bi ibilgailuk talka egin ostean, Segurtasun Saileko iturriek jakitera eman dutenez. Istripua GI-636 errepidean gertatu da, Irungo noranzkoan. Zazpi pertsona Bidasoako eskualdeko ospitalera eta Donostia ospitalera eraman behar izan dituzte, zituzten zauriak sendatzeko.