Gizartea -

KORONABIRUSA

Farmaziako test batean positibo ematen duenak bakartu egin beharko du, baina ez du jakinarazi beharko

Orain arte, farmaziako antigeno-proba batean positibo ematen zuenari osasun-sistemari jakinarazteko eskatzen zitzaion, Osakidetzaren webguneko formularioaren bidez.

Antigeno testak. EiTB Media
Antigeno testak
Farmaziako test batean positibo ematen duenak isolatu egin beharko du, Osakidetzari jakinarazi gabe

1:11

ANE SANTESTEBAN | EITB MEDIA

Whatsapp Facebook Twitter Telegram Email

Osakidetzak protokoloa aldatu du botiketan saltzen diren antigeno-proben inguruan, eraginkortasuna handitzeko helburuarekin. Aurrerantzean, farmazian egindako proba batean positibo ematen duena etxean bakartu beharko da, baina ez dio Osakidetzari jakinarazi beharko. Dena dela, sintomek okerrera egiten badute, Lehen Arretan artatuko dute.

Orain arte, farmaziako antigeno-proba batean positibo ematen zuenari Osakidetzaren webguneko formularioa erabiliz osasun-sistemari jakinarazteko eskatzen zioten. Protokoloa, baina, aldatu egin dela azaldu du Gotzone Sagardui Osasun sailburuak astelehen honetan.

Hala ere, baja bat kudeatzeko, baieztapena beharko da, eta Osakidetzaren webguneko formularioa betez egin beharko da.

Eusko Jaurlaritzako Osasun Sailak jakitera eman duenez, igandean 7.620 covid-19 kasu hauteman dira Araban, Bizkaian eta Gipuzkoan; positibotasuna % 42koa izan da, eta intzidentzia-tasa metatua 14 egunean 100.000 biztanleko 6.691ra igo da. 

Ospitaleetako egoerak okerrera egin du: 796 lagun daude ospitaleratuta gela arruntetan eta 137 gaixo daude EAEko ZIUetan.

Hezkuntza protokolo berria

Eusko Jaurlaritzaren Hezkuntza eta Osasun sailak elkarlanean Hezkuntza protokoloa eguneratu dute, koronabirusak eragindako gaur-gaurko egoerara egokitzeko.

Ikasle batek sintomarik badu, etxean gelditu beharko du eta Euskadi.eus webguneko "nola jokatzen dut?" atalean dagoen formularioa bete beharko du. Webgunearen bitartez zailtasunak dituztenek osasun zentrora deitu ahalko dute.

Ikasgelan positiboren bat balego, gainerako ikasleek eskolara joaten jarraitu beharko dute, beti ere prebentzio neurriak beteta. Sintomarik ez dutenek ez dute etxean geratu beharko eta, berariaz adierazi ezean, ez zaie proba diagnostikorik egingo. Koronabirus kasu gehiago egonez gero eta egoera epidemiologikoaren arabera, aztarnariek erabakiko dute hezkuntza zentroan esku-hartzerik egin behar den ala ez.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.

Hau zure interesekoa bada, baliteke beste gai hauek ere izatea
Bizkaia Gipuzkoa Araba Euskal Autonomia Erkidegoa Gaixotasunak argazkiak Gizartea Eguneko albisteak Albisteak Osasunari buruzko albisteak Sendagaiak Txertoak Koronabirusa Osasun-larrialdi egoera amaitu da EAEn Farmaziak