Gizartea -

KORONABIRUSA

Lehendakariak ostiralerako deituko du LABI instituzionala

Gaur egungo murrizketak urtarrilaren 28ra arte daude indarrean. Bileran hainbat gai jorratuko dituzte, besteak beste, covid pasaportearen erabilera luzatzea ala ez.

labi BILERA
labi BILERA
Urkullu lehendakariak baieztatu du LABIren bilera datorren ostiralerako deitzea aztertzen ari dela

0:59

EITB Media

Whatsapp Facebook Twitter Telegram Email

Iñigo Urkullu lehendakariak datorren ostiral arratsalderako deituko du Babes Zibileko Planaren (LABI) Aholku Batzordea, covid-19aren aurkako egungo prebentzio-neurriak mantendu edo aldatuko diren erabakitzeko. Neurri horien indarraldia urtarrilaren 28an amaituko da.
Elizbarrutiko Kultur Erakundeen Mahaiak sustatzen duen "Carmelo Etxenagusia" ohorezko Aipamenen III. Edizioa Bilboko BBK Aretoan emateko ekitaldira joan aurretik, Urkulluk azaldu du aztertzen ari direla bera buru duen LABIren mahai instituzionalak ostiralean beste bilera bat egiteko aukera, egoera epidemiologikoa aztertzeko eta une honetan hartu beharreko neurriei buruz erabakitzeko.

Ostiraleko bileran, besteak beste, covid ziurtagiriaren erabilera aztertuko dute. Urtarrilaren 31n amaitzen da covid ziurtagiriaren indarraldia, eta luzatu nahi izanez gero, baimena eskatu behar zaio Euskal Autonomia Erkidegoko Auzitegi Nagusiari. Horren harira, Gotzone Sagardui Osasun sailburuak esan du luzapena eskatu behar bazaio Euskal Autonomia Erkidegoko Auzitegi Nagusiari, beste batzuetan egin den bezala, "garaiz" egingo dela.

Bilbon, kazetarien galderei erantzunez Urkulluk adierazi duenez, hainbat erkidegok covid ziurtagiria bertan behera utzi badute ere (Kantabria, kasu), beste batzuek eutsi egiten diote, zenbait herrialdek egin bezala.  Euskadin "covid ziurtagiriaren inguruko egoera guztiak aztertzen ari gara", gaineratu du.

Markel Olano Gipuzkoako ahaldun nagusiaren esanetan, seigarren olatua "pixkanaka-pixkanaka" behera egiten ari den heinean, "orain arte bezala, neurriak pandemiaren bilakaerara egokituko ditugu, baina betiere irizpide teknikoei erantzunez". Bilbon egin den gosari informatibo batean, onartu du ez dakiela LABIren bilera noiz izango den, baina lehendakariarekin hitz egin duela "agendak ordenatzeko".

Aholku Batzordearen azken bilera abenduaren 28an egin zen. Besteak beste, ostalaritza goizaldeko ordu batean ixtea erabaki zuen, eta lokaletan edukiera orokorra % 60koa izan zen, gehienez 10 pertsonako taldeekin. Gainera, barran kontsumitzeko debekua ezarri zuen.

Neurri horiek jasotzen dituen dekretua abenduaren 29an sartu zen indarrean, eta urtarrilaren 28ra arte egongo da indarrean. Adituek aholkatzen dutenaren arabera, luzatu egin daitezke.

Bestalde, Eusko Jaurlaritzak atzo, asteartea, jakinarazi zien foru-aldundiei urtarrilaren 28tik aurrera eskolaz kanpoko jarduera guztien etenaldia bertan behera uzteko aldebakarreko erabakia; beraz, egun horretatik aurrera, eskola-kiroleko lehiaketei ekingo zaie berriro.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.

Hau zure interesekoa bada, baliteke beste gai hauek ere izatea
Urkullu albisteak Gizartea albisteak Gaurko titularrak Albisteak COVID kasuak