Polizien sindikatua: Gobernukoek 'dirua xekeen antzera gastatzen dute'

Gobernuko goi-kargudun bakoitzak (presidentea, ministroak eta Estatu idazkariak, besteak beste) bost auto ofizial dituztela salatu du Poliziaren Sindikatu Bateratuak (SUP, gaztelaniaz) euren barne-aldizkarian.

'Puntukako gidabaimena' izenburupean publikatutako artikuluan, sindikatuak "araua hausten" duten kargudunei isunak jartzeko jokoa egiten dute, puntuak kenduz, zirkulazio kodean egiten ohi den bezala.

Gauzak horrela, artikuluan Jorge Moragas Gobernuko presidentearen Kabinete-arduraduna aipatzen dute, "baliabide materialen kudeaketan neurri bikoitza" erabiltzeagatik. Sindikatuaren arabera, "kargua hartu baino lehen bizkartzainak eta autoak eskatu zituen jada familiakoentzat".

Hala ere, "ministerioetan antzerako karguak daude, guztion dirua xeke arabiarren antzera gastatzen dutenak besteoi murrizketak ezarri eta sakrifizioak egiteko eskatzen diguten bitartean", ohartarazi dute.

"Ustelkeriari lotutako gastuak"

Zentzu horretan, Exekutiboaren goi-kargudunen autoei erreferentzia egiten die, "guztiz doakoak", eta pertsona bakoitzak "hiru eta bost auto artean" dituela salatu dute. Sindikatuaren iritziz, "beharrezkoak ez diren eta ustelkeriari lotuta dauden gastuen % 95 soberan daude".

"Ez dira gastuak murrizten ari, eta hori egiten lehenak izan beharko lukete. Bonoren erretratuagatik 82.600 euro ordainduko dituztela zabaltzen denean, dirua kontrolik gabe gastatzen ari direla salatzen dugu, gutxi batzuen onurarako", esan dute.