40 bizilagun etxetik atera dituzte Basaurin, inguruko pabilioi batean piztutako sutearen ondorioz

40 bizilagun euren etxeetatik atera dituzte gaur goizean Basaurin, inguruko pabilioi batean piztu den sutearen ondorioz. Sutea itzalita, etxera itzuli ahal izan dute.

Eusko Jaurlaritzako Segurtasun Sailak jakitera eman duenez, 06:00ak inguruan piztu da sua, erabiltzen ez zen pabilioi batean, Larrazabal kalean, eta inguruko Ecoplast enpresako beste bi pabilioietara zabaldu da gero.

Oraingoz, kalteak materialak dira eta ez dute inor artatu behar izan kea arnasteagatik. Ertzaintzak ikerketa zabaldu du, sua nola piztu den argitzeko.

Sutea kontrolpean izanik, suhiltzaile talde bat gelditu da orain inguru horretan, freskatzeko.