Saharatik iritsitako hauts laino batekin estali ditu hego-haizeak Euskal Herriko kaleak

Ganduaren irudiak nonahi zabaldu dira goizetik, baina zer da zehazki eta zer ondorio ditu? Atmosferan jazotzen den eguraldiaren fenomeno bat da. Airean harea eta hauts partikulak daudenean gertatzen da, eta, kasu batzuetan, lurra eta errautsak ere izaten ditu.

Espainiako hegoaldea astintzen ari den enbatak Saharatik iritsitako hauts masa bat ekarri du Euskal Herrira. Horren ondorioz, haizearen kalitatea txarra izan daiteke, eta osasunari kalte egiterainoko ondorioak izan ditzake: begietako narritadura, eztula... Horregatik, arnasa hartzeko arazoak dituztenei maskara erabiltzea gomendatu diete.

Ganduak, baina, ez ditu soilik ibilgailu eta kaleko altzariak hauts ilun batekin estali. Murtzian eta Almerian, adibidez, agertoki are erakargarriagoa utzi du. Izan ere, zeruek kolore laranja hartu dute hainbat lekutan. Bestalde, lokatz euria ekarri du Euskal Herriko zenbait tokitara.

Abisu horia haizeagatik

Atzoko 21:00etatik, Hego Euskal Herrian abisu horia dago, haize-bolada bortitzengatik. Eusko Jaurlaritzako Segurtasun Sailak jakinarazi duenez, haizeguneetan 100 km/h-ko ufadak izan daitezke. Hala, neurriak astearte honetako 15:00ak arte iraungo du. Nafarroan, bestalde, abisua egun osoan izango dute indarrean.

Gaur, hego-ekialdeko haize-boladek 100 km/h-ko abiadura gaindituko dute haizeguneetan, batez ere mendi inguruetan. Kostaldean, 80 eta 100 km/h artekoak izango dira, batez ere ekialdean.

Haizeguneak ez diren lekuetan ere, abisu horia aktibatuko da asteartean. Kasu horretan, 80 km/h-tik gorako boladak espero dira Gipuzkoan eta Araban; Bizkaian, berriz, 60 eta 80 km/h-koak. Foru Erkidegoan, 70 km/h-koak izango dira, gutxi gorabehera.