Gizartea -
Gurutzetako Ospitalea
Bikote bat atxilotu dute hiru hilabeteko semeari tratu txarrak ematea leporatuta
Haurtxoak humeroa eta sorbalda hautsita eta begia ubelduta zituela erietxeratu zuten igandean. Gurasoek 22 eta 18 urte dituzte.
E. G. | EITB MEDIA
Ertzaintzak bikote bat atxilotu du hiru hilabeteko semea tratu txar zantzuak zituela Gurutzetako Ospitalean (Barakaldo) erietxeratu eta gero, Segurtasun Sailak baieztatu duenez.
Haurtxoa igandean ospitaleratu zuten humeroa eta sorbalda hautsita eta begia ubelduta zituela, eta han dute oraindik, Bizkaiko Foru Aldundiaren babespean, El Correo egunkariak zabaldutakoaren arabera.
Dirudienez, umetxoa artatu zuen medikuak susmo txarra hartu zien lesioei, eta tratu txarren biktima izan zitekeela eta, epaitegia eta gizarte zerbitzuak ohartarazi zituen. Zaurgarritasun egoeran egon daitezkeen adingabeak babesteko protokoloa aktibatu zuten.
Gurasoak (22 eta 18 urte dituzte) handik gutxira atxilotu zituzten, semeari ustez tratu txarrak ematea egotzita, eta epailearen aurrera eraman dituzte jada.