Gizartea -
Emakumeen aurkako indarkeria
Gizonezko batek lepoa moztu dio emazteari, Madrilen
Emakumezkoa Larrialdietarako Zerbitzuek aurkitu dute, hilda, lurzoruan botata eta lepoan arma zuri batek eragindako zauriekin. Senarra atxilotu dute eta laster eramango dute epailearen aurrera.
Erredakzioa
Emakumezko bat aurkitu dute hilda, ustez senarrak lepoa moztuta, Madrilgo San Blas auzoan. Ostiral honetako 19:00ak aldera, Larrialdi Zerbitzuek dei bat jaso dute eta biktimaren etxebizitzara bertaratzean, emakumezkoa lurzoruan, hilda, aurkitu dute. Biktimak arma zuri batek eragindako zauriak zituen lepoan.
Hilketak argitzeko V. Taldeak senarrari hartu dio susmoa, biktimaren odola garbitzen saiatu zelako. 21:20etan senarra atxilotu dute, emaztearen hilketa leporatuta. Goizean deklarazioa hartu diote eta laster eramango dute epailearen aurrera.
Atxilotuak ez ditu aurrekari penalik eta emazteak ez zituen tratu txarrik salatu. Azken kasu hau baieztatzen bada, emakumezkoen aurkako indarkeriak eragindako hirugarren biktima izango litzateke Madrilen.
