Gizartea -
indarkeria matxista
Epaileak baldintzapean aske utzi ditu Zizurkilen salatutako sexu erasoagatik atxilotuta zeuden bi gizonak
Emakume bati lapurreta eta sexu abusua egitea egotzita atxilotu zituzten bi gizonak igandean, eta Tolosako epailearen aurretik pasa dira gaur goizean.
i.l.k. | eitb media
Epaileak baldintzapean aske utzi ditu Zizurkilen asteburuan salatutako sexu erasoarekin lotuta atxilotuta zeuden bi gizonak.
Emakume bati lapurreta eta sexu abusua egitea egotzita atxilotu ondoren, Tolosako epailearen aurretik igaro dira gaur goizean. Deitzen dituztenean epaitegian aurkezteko baldintzapean libre gelditu dira.
Biktima Villabonako jaietatik etxera zihoala egin zioten eraso, igande goizaldean. Ertzaintzak ikerketa abiatu zuen orduan, jazoeraren nondik norakoak argitzeko. Gainera, beste bi ikerketa ere ditu zabalik Villabonan salatutako erasoengatik.
Hain zuzen ere, elkarretaratzea egin zuten atzo Villabonan azken egunotako jaietan gertatutako zenbait eraso salatzeko, Zizurkilgoa tartean.
Zizurkilgo Udalak "gogor" salatu zuen gertatutakoa, eta "elkartasun eta babes osoa" adierazi zizkion erasoa jasan zuen emakumeari.
Halaber, Gipuzkoako Foru Aldundiak gaitzespen "irmoa" adierazi zuen kasu horren eta Villabonan ere salatutakoaren aurrean. Foru erakundeak indarkeria matxistarik gabeko jaiak nahi zituela adierazi zuen, "emakume guztiek aisialdiaz eta gizarte harremanez berdintasunean gozatzeko aukera izan dezaten".