Gizartea -
Eguraldiaren iragarpena
Giro ederra EAEn, 25º gradurainoko tenperaturarekin
Eguzkia zeruen jaun eta jabe izango da gurean igande honetan eta joera berdinari eutsiko diogu aste hasierako. Datozen bi egunotan termometroak 20-25º-ren bueltan ibiliko dira.
Erredakzioa
Udaberriko giro paregabea izango dugu igande honetan hizpide, Euskalmet Euskal Meteorologia Agentziaren arabera. Goizean goiz laino batzuk agertuko dira kantaurialdean, baina goizean bertan desagertu eta giro eguzkitsua nagusituko da, goi-hodei batzuk baino ez ditugu ikusiko. Eguneko tenperaturan, ez dugu aldaketarik espero, nahiz eta ipar partean apur bat igo daitekeen. Gaua hotzagoa izango da.
Asteari giro egonkorrarekin eta goxoarekin emango diogu hasiera. Astelehenean, egunsentiko behe-lainoa altxa ostean, zeruak oskarbiari eutsiko dio. Eguneko tenperatura oso atsegina izango da, 20 eta 25º artean errendituko baita termometroa. Haizea nora ezean ibiliko da eta eguerdi partean ipar-ekialdetik finkatuko da.
Asteartean, eguraldiak ez dauka aldatzeko trazarik eta udaberriko eguraldi ederrak jarraipena izango du. Haizea ekialdetik sartuko da, indar gutxirekin; arratsaldean iparraldera egin eta egunaren amaieran itsasotik laino maskalak sar daitezke. Eguneko tenperaturak gora egingo du eta arratsaldean bero-hodeiak garatuko dira barnealdean, bereziki mendi inguruetan baina lehertzeko aukera txikia da.
